اخر الاخبار
الرئيسية / كلنا عشاق / معلش بيتبهدل يكتب: مجنون نورهان

معلش بيتبهدل يكتب: مجنون نورهان

كان زمان الحساب الشخصي لي على الفيس بوك اسمه (نور عيني انا) بدل من معلش بنتبهدل، وكانت صورة البروفايل للفنانة نورهان بدل من صورة سمير غانم، لدرجة ان اغلب الناس كانت بتدخل تكلمني على الخاص على اني بنت ، وساعات كنت بشتغلهم.

انا بحب نورهان  من سنة 98 تقريبا، ومن طقوس البيت عندنا ان لو اي حد معاه الريموت وهو بيقلب لقى نورهان علي قناة وانا موجود ميقدرش يغير بعدها من الحج وانت نازل البيت كله والمقربين مني عارفين اني مجنون نورهان وافتكر ان مدرسة الانجلش بتاعة الاعدادي كانت مسمياني مجنون نورهان.

اختي الصغيرة دلوقتي عندها 16 سنة تقريبا، اول ما اتولدت شيلتها وجريت بيها علي المستشفي سميتها نورهان ورجعت.

موضوع نورهان معايا مش مجرد صورة بنزلها يوميا، وكان اقصى خيالي بصراحة اني اشوفها واسلم عليها، لدرجة اني كلمت واحد ووعدته ب500 جنيه لو جابلي عنوان بيتها.

تخيلوا بقى ان بعد ده كله وبعد السنين والايام دي كلها نورهان بقت في قائمة الاصدقاء وبتشير وبتعلق عندي !! تخيلوها كدا !! لا معلش تخيلوها تاني !!!

بحب اشكر كل واحد ساعدني في ان نورهان قبلت الادد بالفعل انت صاحب فضل عليا، ومهما تخيلت مش هتستوعب حجم الجميل اللي انت عملته معايا.

اما بالنسبة للناس اللي بتتكلم علي ان ام كنزي “زوجتي” ممكن انها تغير من حاجة زي كدا، او ازاي تستحمل كل ده او ….. او….. !!

اولا انا وضحتها مليون مرة قبل كدا:
حبي لفنانة مشهورة حاجة، وحبي لمراتي ده حاجة تاني خالص !!

اعتقد ان مراتي عندها من الثقة والجمال ما يكفي من انها متغرش من اي واحدة في العالم، واثقة من حب جوزها ليها من ناحية وواثقة من جمالها من ناحية تاني، عكس ناس كتير.

علي فكرة مراتي عارفة حجم حبي ليها عامل ازاي، وعارفة برضوا ان بنزل صورة الفنانة نورهان يوميا وراها رسالة لكل واحدة عندي سواء صديقة او متابعة ، والحدق يفهم… دي تقريبا كل قصتي مع معشوقتي نورهان.

شارك برأيك

شاهد أيضاً

حنان فتح الباب تكتب: خواطر عابرة

اتي الشتاء مسرعا كأنه يعلم بارأدتي في تجميد هذا الإحساس الذي يجول بداخلي كفارس منتصرا …

أضف تعليقاً

لن يتم نشر عنوان بريدك الإلكتروني.